(मूल अंग्रेजी कहाणी Post Mortem )
डॉ. कुमार चङा दफा हुन पोस्टमार्टम रिपोर्ट खे पढ़ियो । पोस्टमार्टम रिपोर्ट ते लिखयल अखर
हुन जा जा॒तलि सुञातलि हुआ । हजारें दफा हुन इन्हे हैंडराइटिंग में लिखयल रिपोर्टूं सही कयू हून्दियूं । मुहिंजू अखियूं धोखो न थियूं खाई सघन ।
हा ही पक मेमन ई आहे हू मन ई मन में सोचींदो रहियो। हुन उन्हें रिपोर्ट खे हथ में पक्को झले रखियो, हुन खे ड्रपु हुओ त मतां न रिपोर्ट वारो शख्स जिंदह थी वञे ऐं मुंखे गि॒चीअ खां अची पकड़े।
डॉ. कुमार जो असिस्टंट मेमन चीर फाड़ घर में आयल लाशुन जो पोस्टमार्टम कंदो हुओ । हॉस्पिटल में जेके बि मुर्दा ईंदा हुआ उन्हन जो चीर-फाड़ करे, चङीअ तरह जांच करे, रिपोर्ट ठाहे अची डॉ. कुमार जे टेबल ते रखंदो हुओ। डॉ. कुमार बि हिकु दफो वरी लाश खे चेक करे, रिपोर्ट ते सही कंदो हुओ।
मेमन हॉस्पिटल खां चङो परे हिक नंढड़े गोठ जो रहाकू हुओ। मेडिकल साइंस में डिप्लोमा कई हुअईं। डॉ. कुमार जे अचण खां चङो अगु खां ई हू हिन इस्पताल में लगो हुओ ऐं शुरूअ खां ई हुन खे हिन पोस्टमार्टम वारे कम ते लगायो वियो हुओ। मेमन खां अगु जेके बि माण्हू हिन डिपार्टमेंट में आया छह महिना खनु रही पहिंजो ट्रांसफर कराए हलिया विया। लाशुन जे विच में सजो॒ दिं॒हु गुजारिण हुनन खे नागवार पिए लगो।
पर मेमन कद॒हिं बि पहिंजी बदलीअ जी कोशिश न कई। हू हमेशा चवंदो हुओ, "कहड़ो बि कमु दियो, मां पूरी लगन ऐं ईमानदारी सां कंदुस। कहिंखे बि शिकायत जो मौको कोन दीदुस।"
हॉस्पिटल जे रिकार्ड मूजिब मेमण पंजवीहन हजारन खां मथे पोस्ट मार्टम कया हुआ। हुन जो कमु हुओ बि दुखियो। चोवीह ई कलाक उते रहणो पवंदो हुओ। खबर नाहे कहिड़े वक्त का लाश अची वञे। घाटीअ में आतंकवादी घटनांऊ वधी रहियूं हुयूं। रात बेरात पोस्टमार्टम लाइ लाशें ईंदयू रहंदियूं हुयूं।
मेमण बि मुस्तैदीअ सां पहिंजो कमु कंदो हुओ, कद॒हिं बि कहिंसा का शिकायत कोन कयईं।
करमु ई हुन लाइ पूजा हुई। हुन खे इहा जा॒ण हुई त हुन जे कम में थोरी बि घटि वधाई थी त उन्हे जो असर छा थींदो। को बेदो॒ही जेल जी सलाखुन जे पुठियां बि वञी सघे थो। इन्हेकरे हू दाढो ध्यान सां पहिंजो कमु कंदो हुओ। कम कंदे कंदे एतरो होशियार थी वियो हुओ जो लाश खे दिसंदे ई समझी वेंदो हुओ त मौत जे पुठियां कहड़ो कारण थी सघे थो। मौत फांसी लगा॒इण सां थी आ या ज़हर पियण सां।
लाशघर हुन जे लाइ ज॒णु पहिंजो घर हुओ। कद॒हिं कद॒हिं त रात जो देर ताईं उते ई वेठो हून्दो हुओ, ज॒णु कहिं मुर्दे जे अचण जो इन्तजार कंदो हुजे। कद॒हिं हथ में औजार खणी खाली टेबल जे साम्हू बीठो हून्दो, जण त पोस्टमार्टम करे रहयो आहे।
हू हमेशा सोचींदो हुओ त हितां रिटायर थियण खां पो छा कंदो। ज़िंदह माण्हुन जे विच में रहण जी त आदत ई कोन्हे। सजो॒ दिं॒हु गिलाऊं, नेकियूं, झेड़ा, झग॒ड़ा, जात-पात जो वैर, हिंसा, आतंकवाद।
इन्सान जेसी जियरो आहे, इन जा॒र में फाथल आहे। तहिंखा त हे मुड़दा चङा आहिन। न कहिंसा गा॒ल्हाइन न बोल्हाइन, न कहिंजी गिला न कहिंजी पचर। बा॒र हुजे, बुढो हुजे, औरत हुजे या मड़द हुजे। हिते सभु हिक जहड़ा।
डॉ. कुमार पोस्टमार्टम जी रिपोर्ट खे पक्को झले बीठो हुओ। ट्रे दिं॒हु अगु ई त हुन छुट्टी घुरी हुई। मां पाण हुन जी छुट्टी मंजूर कई हुई ऐं अजु ही पोस्टमार्टम रिपोर्ट..... डॉ. कुमार हिकु दफो
वरी रिपोर्ट खे पढ़ियो.....
नालो - मुहम्म्द मेमण
उमिर - ५३ साल
सेक्स - Male
मौत जो वक्तु - रात जो हिकु लगी॒ पंजाहु मिन्ट
मौत जो कारण - कहिं ज़िंदह माण्हूअ जे जहर पियारिण सबब।
लेखक डा. विनोद आसूदाणीअ जी लिखयल मूल अंग्रेजी कहाणी Post Mortem जो सिंधी तर्जुमो
तर्जुमेकार - किशोर लालवाणी , नागपुर
टिप्पणियाँ
एक टिप्पणी भेजें