आखिर छो....?
अजु॒ TV समाचार चैनलनि ऐं सोशल मीडिया जे हर हिक प्लेटफार्म ते फिल्मी दुनिया जे मशहूरु एक्टर *सुशांत सिंह राजपूत* पारां फांसी लगा॒ए करे आपघात करण जी घटना जी चर्चा हले पई थी. हीउ हृदयविदारक घटना बु॒धी करे मन में हिकु सुवाल उथियो आहे, आखिर छो ?
चयो वेंदो आहे त इहा अमुल्ह मानुष जीवनु घणेई योनियुनि जा चक्कर लगा॒इण खां पोइ मिलंदो आहे. हर कोई माण्हू बि॒ए कहिंसा प्यार करे न करे पर पहिंजे पाण सां प्यारु जरूर कंदो आहे. अहिड़ी सोच रहण खां पोइ बि अगर कोई माण्हू अहिड़ो कदमु खणदो आहे त मन में सहज ही सुवाल उथंदो आहे , आखिर छो ?
सुशांत सिंह राजपूत हिकु कामियाबु ऐं हर दिल अजीज अभिनेता हुओ, उन जी हर हिक फ़िल्म सफलता प्राप्त कई हुई. सब कुझु हासिलु हुअण खां पोइ बि आखिर छा वजह हुई जो उन अहिड़ो घातक कदम खंयो ?
वजह छा रही हूंदी , इहो त फिलहाल भविष्य जे गर्भ में ई आहे, पुलिस जांच खां पोइ सही जा॒ण दुनिया जे सम्हूं ईंदी. इन एक्टर जो दुखद अंत , सभ्य समाज जे साम्हूं घणेई सुवाल छडे॒ वयो आहे.
मुखे निजी तौर ते इहो महिसूसु थींदो आहे त अहिड़ो घातक कदमु खणण जे पोयां माण्हूअ जो एकाकी जीवन हूंदो आहे. एकाकी जीवन जियण वारो माण्हू अणजा॒णाईअ में ई अवसाद (डिप्रेशन) जो शिकारु थी वेंदो आहे . डिप्रेशन में अची करे ई कोई बि माण्हू इन प्रकार जा निर्णय करण लगं॒दो आहे, जहिंजो परिणाम असांखे इन रूप में बु॒धण में ईंदो आहे.
एकाकी जीवन खां बचाव जो सबखां सुठो ऐं सरल तरीको पहिंजे पिरयनि (अजीजनि) सां निकटता ऐं दोस्तनि सां गुजारियल फुरसत जा ब॒ पल ई आहिनि. असां पहिंजे अजीजनि सां ऐं दोस्तनि सां हिरी-मिरी करे रहण जी कोशिश कंदासीं त इहो यकीन मञो कोई बि माण्हू डिप्रेशन जो शिकारु कड॒हिं बि न थींदो.
घर जे वड॒नि खे बि हमेशा ध्यानु रखणु घुरिजे त उन जे परिवार जो कोई भाती अकेलेपन जो शिकारु त न थी रहियो आहे. अगर घर जो कोई भाती परिवार जे भातियुनि सां कटिजी करे परे रहण जी कोशिश करे रहियो आहे त उन जे पोयां छा वजह आहे , इन जी गो॒ल्हा करण जी कोशिश जरूर कजे , न त हिकु डीं॒हुं अहिड़ो सम्हूं अची वेंदो जो पछतावे जे आलावा कुझु बि हासिलु न थींदो.
परिवार जो कोई बा॒र अगर वार-वार हिक ई प्रकार जी दाहं करे रहियो आहे त इहो न सोचणु घुरिजे त इहा त इन जी रोज-रोज जी आदत बणिजी वई आहे. पहिंजे बा॒र जी हर हिक नंढी मां नंढी तकलीफ खे महिसूसु करण जी कोशिश कजे ऐं जेतिरो संभउ थी सघे उनखे दूर करण जी कोशिश जरूर कजे. कोई धारियो माण्हू बि कोई समस्या असांसां सांझी करे थो त उन समस्या खे पाण ताईं रखी करे उन जो समाधान जरूर कजे.
घणा ई भेरा हिक माण्हूअ खे अकेलो ऐं एकांतप्रिय बणाइण में उनजे परिवार जो बि हथु हूंदो आहे.जड॒हिं कहिं सफल ऐं सच्चे माण्हूअ जी परिवार में लगातार उपेक्षा कई वेंदी आहे या उनखे उहो मान- सन्मानु न मिलंदो आहे, जहिंजो हू हकदार हूंदो आ तड॒हिं हू हमेशा वीचारु कंदो रहंदो आहे त अगर बि॒या मुहिंजो एतिरे कदुरु-मानु डि॒यनि था,त पोइ मुहिंजो परिवार सदाईं मुहिंजी उपेक्षा छो करे रहियो आहे ? "मूसां ई इहो छो थी रहियो आहे ?" इहो सुवाल उनखे वार-वार सोचण ते मजिबूर करे छडीं॒दो आहे ऐं उहो माण्हू होरियां-होरियां सभिनि खां परे थी वेंदो आहे.
जीवन में सबखां करीबी रिश्ता सची दोस्तीअ जा हूंदा आहिनि . जीवन में कुझु समस्याऊं ऐं कुझु गा॒ल्हियूं अहिड़ी बि हूंदियूं आहिनि जेके परिवार जे सदस्युनि सां माण्हू सांझी करण में हिचक महिसूसु कंदो आहे. इहे गाल्हियूं ऐं समस्याऊं दोस्तीअ में जरूर सांझी कजनि. जेकड॒हिं उनजो हलु न बि मिलंदो त बि दिलि जो बो॒झु जरूर घटि थी वेंदो आ ऐं माण्हू अवसाद (डिप्रेशन )जो शिकारु थियण खां बची वेंदो आहे.
असां कहिं सफल माण्हूअ खे डि॒संदा आहियूं त इअं लगं॒दो आहे त कहिड़ी त सुठो जीवनु अथसि पर सुशांत सिंह राजपूत जहिड़ा सफल ऐं खुशहाल जीवन जा मालिक अगर आपघात जहिड़ो कदमु खणंदा आहिनि त मन में सुवाल जरूर ईंदो त अहिड़नि कामियाब माण्हुनि जे जीवन में बि आखिर कहिड़ी कमी रहिजी वई?
कहिं कवीअ बि खूब चयो आहे त कहिंजे चेहरे जी खिल ते न वञो , छा खबर उहो खिली करे दिलि जा कहिड़ा जखम लिकाए रहियो आहे. कुझु मुश्क डु॒खनि खे लिकाइण लाइ बि थी सघंदी आहे .
अहिड़ियूं घटनाऊं असांखे हिकु सबकु डे॒ई वेंदियूं आहिनि त अञा वेल कोन वई आ, पहिंजा रिश्ता सुधारियो न त सिवा अफसोस जे कुझु बि न रहिजी वेंदो. असां वञण वारे जी लख गो॒ल्हा कयूं, उन ताईं न पहुंची सघंदासीं . हिक फ़िल्म जो मशहूरु गीत सां अजु॒ जे वीचार खे विराम थी डि॒यां...
जाने चले जाते हैं कहां ,
दुनिया से जाने वाले
कैसे ढूंढे कोई उनको ,
नहीं कदमों के भी निशां....
-तमन्ना मतलाणी
गोंदिया महाराष्ट्र
टिप्पणियाँ
एक टिप्पणी भेजें