पछताव जा गो॒ढ़ा (कहाणी)
बाइक स्टार्ट करे सुमीत घर तरफ हलण लगो॒ रस्ते ते हर घड़ीअ हिन जे कनन ते अंजलीअ जा चयल लफ्ज़ गूंजिजी रहिया हुआ।
"सुमीत तूं छा थो समझीं त मां तोसां प्यार थी करियां न सुमीत न तूं ग़लत आहीं, तुहिंजी सोच गलत आहे। तूं गलत सोचे रहियो आहीं त मां को तोसां प्यार न कंदी आहियां। मां त तुहिंजे पेसे सां प्यार कंदी आहियां, तुहिंजे पैसे सां। छा समझियुइ मां तो जहिड़नि कंगालनि, खाली खीसे वारनि खे त पहिंजे भरि में बि बिहणु न दिया। हुं।"
इहड़ा जुमला बार बार सुमीत जे कनन ते टकराइजी रहिया हुआ जेके अंजलीअ हिन खे कुझ वक्त अगु ई चया हुआ।
कलाक खनु अगु ई हू खुश थींदो अंजलीअ सां मिलण जुबली पार्क में पहुतो हुओ। हिन ई फोन करे अंजलीअ खे उते घुरायो हुओ। हिन ई बाग में हू ब॒ई रोज़ मिलंदा हुआ। हिक बि॒ए जे गले में बा॒हूं विझी पाण में प्रेम भरियूं गा॒ल्हियूं कंदा हुआ। हिकु दींहु बि हिक बि॒ए खे न दि॒संदा हुआ त बिन्हीं मां कहिंखे बि चैन न ईंदो हुओ। जिते हीउ रोज़ गड॒जंदा हुआ उन मुकर्रर जदिगहि ते अंजलीअ खे दि॒संदे ई हू खुशीअ में अची वियो।
"अंजली मुंखे खबर हुई त तूं ज़रूर ईंदीअं"
"तूं सदु करीं ऐं मां न अचां। इहो थी ई न थे सघे।"
"थैंक यू अंजलि। मुंखे विश्वास आहे त तूं मुंखे बेहद प्यार करी थी।"
"चङो चङो हाणे मस्का न लगाइ। मुद्दे जी गा॒ल्हि करि। चउ तो मुंखे ओचतो कीअं घुरायो आहे"
"मुहिंजो विचार आहे त अजु॒ असां फिल्म ते हलूं। "राम लीला" नई फिल्म लगी॒ आहे। चवनि था बेहतरीन लव स्टोरी आहे हिन में।"
"न मां न हली सघंदसि।"
“छो? इहड़ी मस्त फिल्म आहे ऐं तूं हलण जी न थी करीं। मां केतरो न दिल सां तोखे चवां थो ऐं तूं मुहिंजी दिल थी टोड़ीं।"
"पर मुहिंजो अजु फिल्म दिसण जो मूड कोन्हे सुमीत ऐं घर बि जल्दी वापस वञिणो आहे।"
"मस मस मुहिंजे दोस्त खे चई करे फिल्म जूं टिकेटूं घुरायूं अथमि। हूं असां जे थिएटर ते राह दिसंदो हूंदो ऐं तूं...."
अंजलीअ सुमीत जे जुमले खे विच में कटींदे चयो "प्लीज़ सुमीत! मुंखे फिल्म ते हलण लाइ जिदु न कर। कुझ बि थी वञे मां अजु॒ फिल्म ते न हलंदसि।"
"तूं त दा॒ढी ज़िद्दी आहीं अंजलि। एतरो ज़िदु ठहे थो।" नाराज़ थींदे सुमीत चयो।
"................"अंजलिअ को बि जवाबु कोन द
दि॒नो।
कुझ देर शांतिअ बैदि अंजलीअ शांतिअ खे टोड़ीदे चयो "सुमीत तो मुंखे बुधायो कोन त तो हिते मुंखे छो घुरायो आहे।"
"सॉरी अंजलि, जेका तुहिंजी मर्जी। तूं फिल्म ते न थी हलण चाहीं त न सही। हाणे त बस..."
"चउ कहिड़ी गाल्हि आहे जेको चवणो हुजई जल्दी चउ। मुंखे जल्दी घर वापस वञिणो आहे।"
अजु॒ अंजलीअ जी इहड़ी हलत ते सुमीत वाइड़ो थी वियो। अगे॒ कदहिं बि अंजली हिन अगियां इहड़े नमूने पेश न आई हुई। सुमीत घब॒राइण लगो। विचारनि में गुम थी वियो।
हथ जी आड़िरियुनि सां चपटी वजाईदे अंजलीअ चयो "ए हलो। सुमीत। मां तोखां कुझ पुछी रही आहियां ?"
"छा छा चयो तो!"
"कुझ वक्तु अगु॒ मां जेको तोखे चयो सो तो न बुधो छा ?"
"न मां पहिंजे विचारनि में होसि।"
"न बुधो अथई त हाणे बु॒धु।तो मुंखे फोन करे हिते छो घुरायो आहे ?"
"अजु मां तोखे हिते इन्हेकरे घुरायो आहे त मां तोखे पहिंजी दिल जी गा॒ल्हि बुधाए सघां।" थोरो तरसी
"आखिर केसताई असां पाण में हीअ लिक छिप में मिलंदा रहंदासीं ? मां तोखे केतरा दफा चयो आहे त तूं जल्दु ई पहिंजे पीउ सां गा॒ल्हि कढु त असां ब॒ई शादी करिण चाहियूं था।"
"सुमीत.... मां न थी समझा त को असांजी शादी थींदी। मां पहिंजे पीउ जे साम्हू गा॒ल्हाइण जी हिमथ कोन थी करे सघां। मां पहिंजे पीउ खे सुञाणां सुमीत। हू असांजी शादी हरगिज़ न थियण दीं॒दा। तव्हां शाहूकार आहियो ऐं असां मिडिल क्लास फैमिलीअ मां अचूं था। तव्हां आसमान आहियो त असीं ज़मीन। सो तुहिंजो ऐं मुहिंजो मेल थियणु मुश्किल आहे। अगिमें बि मूं तोखे इन गाल्हि खां वाकुफ कयो आहे।"
"अंजली तूं हिकु दफो गा॒ल्हि त करे दि॒सु न पहिंजे डैडीअ सां। ही तुहिंजी ऐं मुहिंजी जिंदगीअ जो सवालु आहे।"
"ऐं ही मुहिंजो बि आखरीन जवाब आहे त मां पहिंजे पीउ साम्हू गा॒ल्हाइण में असमर्थ आहियां। मुहिंजी हिमथ ई कोन कोन थींदी त...."
सुमीत विच में कटींदे चयो "तुहिंजी पहिंजे डैडीअ अगि॒यां गा॒ल्हाइण जी हिम्मथ कोन थी थिए त पो असां वटि हिकु रस्तो आहे त असां ब॒ई भजी॒ हलूं।"
"भजी॒ हलूं।" अंजलीअ अजब मां पुछियो।
"हा भजी॒ हलूं। बियो को रस्तो ई कोन्हे असांखे शादी करिण जो।"
"मां भजी॒ करे शादी करिण में विश्वास न थी रखां।"
"त पोइ तूं ई बुधाइ अंजली छा कयूं ?"
“हीअर मुंखे बि लगे॒ थो त मां, असां तव्हां सां ठही कोन सघंदासीं। तुहिंजा माइट्र असांखे पाण खां नंढो समझनि, असांखे धिकारिन, असांसां नफरत कनि त मां बि इहो कोन सही सघंदसि।"
"इहड़ी का बि गा॒ल्हि नाहे अंजली। मुहिंजा माइट्र इहड़ा न आहिन। मां उन्हनि खे चङीअ तरह सुञाणां। ऐं मां.....मां बि त तोखां सवाइ हिकु पलु बि जुदा रही न थो सघां।"
"शादीअ खां अगु सभई इएं चवंदा आहिन, पर पोइ वक्त ईंदे सुभु कुझ बदिलजी वेंदो आहे। मुंखे लगे॒ थो हाणे मुंखे हितां हलणु घुरजे। अजायो तुहिंजो ऐं मुहिंजो वक्तु बदबाद थी रहियो आहे।"
"मां...मां तुहिंजो वक्तु बरबाद करे रहियो आहियां ? छा तूं मुहिंजो वक्तु बदबाद करे रही आहीं। अंजली तोखे आखिर थी छा वियो आहे।? तूं अजु कुझ अलग मूड में नज़र अची रही आहीं। आखिर गाल्हि छा आहे मुंखे त कुझ बि समझ में न थो अचे। तूं जीअं चई तीअं मां करिण लाइ तैयार आहियां। मां तुहिंजे करे पहिंजे माउ पीउ खे छदे॒ आयो आहियां। तुहिंजे करे फकत तुहिंजे करे। हलु त असां ब॒ई हली मंदिर में शादी कयूं।"
" मुंखे भजी करे शादी करिणु मंजूर नाहे।"
"त बाकी तोखे छा मंजूर आहे ? आखिर तूं चवण छा थी चाहीं ? "
"मां इहो थी चवण चाहियां त तूं मूं सां धाम धूम सां शादी करि पो माउ पीउ खां अलग॒ हली किथे घर वठी रहूं था।"
"इहो मुमकिन नाहे।"
"छो ?"
"मां अलग॒ रहण जी गा॒ल्हि कढंदुस त मुहिंजा माउ पीउ, मुहिंजा माइट्र मुंखे घर मां कढी छदीं॒दा। मूं सां कहिं बि किस्म जो रिश्तो न रखंदा ऐं न ई मिल्कियत में को हिस्सो दीं॒दा। धाम धूम सां शादी कराइण त परे जी गाल्हि आहे।"
"इहो ई! इहो ई मां दि॒सणु पई चाहियां त तूं छा थो चवणु चाहीं। तूं मूं सां अलग॒ रहणु चाही थो या न। ऐं उहो बि मुहिंजुनि शर्तुनि ते। मां जीअं चवां तीछा समझियुइ?"
"मां तोसां अलग रहणु चाहियां थो पर...पर...."
"पर तोखे मिल्कियत, धन, दौलत मां तुहिंजो हिस्सो न मिलंदो। इहो ई थो चवण चाहीं न तूं?"
"हा"
"त बुधी छदि॒। मां हिन तरह तो सां शादी करिण लाइ बिल्कुल तैयार नाहियां।"
"अंजली, अंजली, हे तूं छा चई रही आहीं!"
"मां जेको चई रही आहियां उहो बिल्कुल सचु ऐं सही आहे। इज़ इट क्लीअर मिस्टर सुमीत।"
"अंजली मां तोखे बेहद प्यार करियां थो। तूं बि मुंखे प्यार कंदी आहीं। विच में मिल्कियत किथां आई। असांजे सच्चे प्यार जो छा ? छा तूं मुंखे....."
".........."अंजलीअ को बि जवाब कोन दिनो।
"अंजली तूं उहे मुलाकातूं विसरी वईअं उहे प्यार जा वचन। हिक बि॒ए खां जुदा न थियण जा कसम खाधा हुआसीं असां।"
"हाणे मां इहो सभु कुझ याद न थी करिणु चाहियां। मुहिंजे लाइ इहो हिकु सुपनो हुओ सुमीत"
"तूं भले उन्हे खे सुपनो समझु पर मां न। मां तोखे सच्चीअ दिल सां प्यार कयो आहे ऐं कयां थो। मुहिंजी हालत ते तरसु खाउ। मां तुहिंजे वास्ते सभु कुझ छद॒ण लाइ तैयार आहियां। मां तोखे हर तरह सां सुखी रखण जी कोशिश कंदुस।"
"तूं मुंखे सुखी रखी सघंदें ?मुंखे रहण लाइ बंगलो, खाइण लाइ सुठो खाधो। होटलुन में घुमणु, पाइण लाइ उचा ऐं कीमती कपड़ा, घुमण लाइ मोटर कार, घर में नौकर चाकर, फ्रिज, एल.सी.डी वगैरह दई सघंदे छा ? सो बि घर मां जुदा थियण खां पोइ। मुंखे बि त के सुपना आहिन, उमंगू आहिन, तमन्नाऊं आहिन। उन्हनि जो छा थींदो ? छा तूं बिना पैसनि जे इहे सभु पूरियूं करे सधंदें ?"
"इन्हे जी माना तूं मूं सां न, मुहिंजे पैसे सां प्यार करे रही हुईअं।"
"हा बराबर। इएं ई। तूं हाणे सही समझियो आहीं। मुंखे प्यार सां गडु॒ पैसो बि घुरजे। मां जिअणु चाहियां थी। सुखी जीवन थी जियणु चाहियां। घुटिजी घुटिजी जिंदगी जियणु मुंखे पसंद नाहे। मां आज़ाद पंछीअ वांगुर हिक इहड़ी दुनियां में थी जियणु चाहियां जिते बस तूं हुजीं ऐं मां हुजां। बियो को बि न हुजे। ससु, सहुरे, जो बंधन मां पसंद न कंदसि। बिना पैसनि जे छा तूं मुहिंजूं इहे सभु घुरजू पूरियूं करे
सघंदें ?"
"अंजली, मां तोखे भरपूर प्यार दीं॒दुस। तुहिंजी हर घुरिज मां पूरी करिण जी कोशिश कंदुस। मां तुहिंजे मथां पहिंजी जान बि कुर्बान करिण लाइ तैयार आहियां।"
“तुहिंजी जान खे मां छा कंदस ? मुंखे तुहिंजी जान न तुहिंजा पैसा खपनि। तुहिंजो धन, दौलत घुरजे, ऐशो आराम भरियो हिकु सुखी जीवन घुरजे।"
"मतलब त तोखे प्यार न पर पैसो घुरजे।"
"हा, इएं ई समझु। घड़ीअ घड़ीअ सागो॒ सवालु छो थो पुछीं? कूझ गा॒ल्हियूं समझण जूं थींदियूं आहिन। आखरी दफो चवांइ थी। वरी न चवंदी मांइ।"
"जे इहड़ी गा॒ल्हि हुई त तो हेतरो वक्तु मुंखे ऊंदहि में छो रखियो मूं सां प्रेम जो नाटकु छो कयुइ ? मुहिंजे जज़्बातनि, मुहिंजे अरमाननि सां खेदण जो तोखे कहिड़ो अधिकार हुओ ? मुहिंजी दिल तोड़े कहिड़ो सुख मिलंदो तोखे ? छो तूं मुंखां सवाइ सुखी रही सघंदीअं ?"
"चरियो आहीं एतरो बि न थो समझीं त जद॒हिं मां तोसां प्यार कंदी हुअसि त तूं हिक शाहूकार
जो पुट्र हुएं। मुंखे लगो तूं मुहिंजी हर गा॒ल्हि मजीदें। माउ पीउ खां पहिंजो हिस्सो वठी मूं सां अलग रहदें।पर न.....हाणे तूं पहिंजे माउ पीउ खे छदे॒ आयो आहीं त तो में मुहिंजो कहिड़ो कमु। बिना पैसनि जे तुहिंजी हस्ती कहिड़ी आहे। ज़ीरो। तूं पहिंजी हस्ती मिटाए आयो आहीं सुमीत।"
"अंजली मां मेहनत कंदुस। कमाईंदुस। मां घर बा॒र माउ पीउ तुहिंजे करे ऐं फकत तुहिंजे करे छदे॒ आयो आहियां। मां हुनन खे मञायो आहे। हू असां बिन्हीं जी शादी कराइण लाइ तैयार आहिन। मुंखे बुधाइ हींअ अलग रहण लाइ कहिड़ा माउ पीउ मञीदां। मां बि त हुनन खे प्यारो आहियां। हिकु ई सिकीलधो पुट्र आहियां। पोइ हू मुंखे कीअं छदीदां? मुहिंजी खुशीअ लाइ हुनन तोसां शादीअ लाइ हा कई ऐं मां बेवकूफ पहिंजे अंधे प्यार जे खातिर। तुहिंजी खातिर हुनन खे छदे॒ आयुस। ऐं हाणे तूं ......तूं। मुंखे कहिड़ी खबर त तूं......"
अंजलीअ सुमीत जी गाल्हि खे विच में कटींदे चयुस "हाणे त खबर पियइ न। मुंखे लगो मुंखे तो सां गदु॒ तुहिंजो पैसो बि मिलंदो। आज़ाद जीवन बि मिलंदो। हिन सिचुएशन में मुंखे तुहिंजी ज़रूरत नाहे सुमीत।"
"त पो तूं बि बुधी छदि। दुनियां में पैसे सां सभु कुझ खरीद करे सघंदीअं ऐशो आराम पूरा करे सघंदीअं पर सुखी न रही सघंदी। पैसे पुठियां तुहिंजी अंधी सोच तोखे बरबाद करे छदींदी अंजली। जदहिं तोखे मुहिंजे सच्चे प्यार जो एहसास थींदो त पछताईंदीअं"
“मिस्टर सुमीत तूं बि बुधी छदि। पैसे सां सभु कुझ खरीद करे सघिबो आहे। पैसा हूंदा त प्यार बि खरीद करे सघिबो। तुहिंजो न त बिए कहिंजो..."
सुमीत बिना कुझ बुथे पहिंजी बाइक चालू करे रवानो थियो। हीउ सजो॒ नज़ारो हिन जे अखियुनि अगियां घुमण लगो॒ हिन जो दिमाग चक्कर खाइण लगो॒ । इहो सभु सोचे सोचे हू बाइक हलाईदो रहियो। हिकु दफ़ो त एक्सीडेंट थींदे थींदे बि रहिजी वियुस।
हिन गा॒ल्हि खे छह महिना खनु गुज़री विया। सुमीत अंजलीअ खे विसारिण जी कोशिश करिण लगो॒ । हिन पहिंजे पीउ जे धंधे में ध्यान दियणु शुरू कयो ऐं आहिस्ते आहिस्ते हू धंधे में बि सेट थियण लगो॒। हिन जे माउ पीउ संदसि शादी करिण जी दाढी कोशिश कई पर हिन न मजियो।
हिक दींहु सुबुह जो हमेशह जियां इखबार खणी नज़र मां कढण लगो॒ त ओचितो हिन जी नज़र हिक ख़बर ते पई। खबर पढ़दे छिरकु निकरी वियुसि। "इंजिनियर विवेक खटवाणीअ जी थीउ अंजलीअ आपघात कयो आहे। आपघात करिण जो सबबु खबर न पई आहे। अगिते जांच जारी आहे।" समाचार सां गदु॒ गले में फासीअ जो फंदो लगलु अंजलीअ जो फोटो बि दिनलु हुओ।
हे छा थी वियो सुमीत मन ई मन सोचिण लगो। हुन जे अखियुनि में गोढ़ा तरी आया। "अंजलीअ इहड़ो कदमु छो खयों हूंदो"
बि॒ए दींहु हू दुकान बंद करे राति जो घर आयो। हथु मूंह थोई वेठो मस हुओ त माणस हिकु लिफाफो आणे हथ में दींदे चयुस। “सुमीत। तुहिंजे लाइ ही लिफाफो आयो आहे।"
"कहिंजो आहे ?"
"अलाए। मां त खोले बि कोन दिठो आहे।" माणसि खेसि लिफाफो दई हली वई।
सुमीत लिफाफो खणी गैलरीअ में आराम कुर्सीअ ते अची वेठो। बाहिर मीहु वसी रहियो हुओ। विजूं चमकी रहियूं हुयूं।
सुमीत लिफाफो ध्यान सां दिठो। मोकलिण वारे जी का ऐड्रेस कोन हुई। हुन लिफाफो खोले दि॒ठो। हैंडराइटिंग दि॒सी समझी वियो त ही खतु अंजलीअ लिखयो आहे।
"प्यारा सुमीत,
तोखे मुहिंजो खतु दि॒सी अचरज लगो॒ हूंदो न। लग॒ण ई घुरजे। सभु नाता तोड़े छदे॒ वञण खां पोइ मां तोखे खतु जो लिखी रही आहियां। सॉरी सुमीत, मां तो सां दगाबाजी कई। तुहिंजी जिंदगी बर्बाद कई। हाणे मुंखे उन्हे जो फल थो भोग॒णो पवे।
सुमीत, तोखे याद आहे असांजे क्लास में कमल नाले हिकु छोकरो पढंदो हुओ। हुन जी मूं ते नज़र हूंदी हुई। तोखा परे वञण जी खबर पवंदे ई हू मुहिंजे वेझो आयो। हुन मूं सां सहानुभूति दे॒खारी। मुंखे बि को सहारो खपंदो हुओ। हू ठाहूको जवान हुओ। शाहूकार हुओ। मां हुन जे प्यार में पइजी वियसि। असी रोज़ गदि॒जंदा हुआसीं। मां इहो न समझी सघियसि त प्यार छा थींदो आहे। मुंखे खबर कोन हुई त हू....हुन मुंहिंजो ग़लत फाइदो वरतो सुमीत। मतलब निकरंदे ई हुन मुंखे छदे हिक शाहूकार जी धीउ सुलोचना सां शादी कई।
मुंखे माफ कर सुमीत। मां तुहिंजी दोहारिण आहियां।मां तोसां दगाबाज़ी कई, तोखे ज़लील कयो। मां पहिंजे कए ते पशेमान आहियां। मुंखे पहिंजी गल्तीअ जो एहसास थियो आहे। तोखां दूर थी मां दा॒ढो पछतायां थी सुमीत। मां कहिंखे मुंह देखारिण जे लायक न रही आहियां। मां कादे वञां। कहिड़े मुंह सां तोसां गाल्हायां।
हाणे त बस मूं वटि हिकड़ो ई रस्तो बचियो आहे त मां.....। मुंखे खबर आहे तूं मुंखे माफ न कंदे पर मुंखे माफी घुरण जो हकु त आहे नाज़िंदगीअ में तो मूं सां सच्चो प्यार कयो आहे।
माफी तलबगार,
अंजली"
खतु पढ़ी सुमीत जे अखियुनि में गो॒ढ़ा अची विया। गो॒ढ़न जूं बूंदू खत ते किरी खत खे भिजाए रहियूं हुयूं। बाहिर तेज़ हवा हली रही हुई। हिन जे हथनि मां खतु छदा॒इजी वियो ऐं हवा जे तेज़ झोंके ते बा॒हिर निकरी वियो ऐं बारिश जी बूंदुन में पिसीआहिस्ते आहिस्ते तिरकण लगो हुओ।
लेखिका
- श्रीमती कौशल्या गुरदास आहूजा
राजकोट
('जिंदगीअ जे हिन मोड़ते' किताबमां)
टिप्पणियाँ
एक टिप्पणी भेजें