काके उन वक़्त घणो मूंझारो महिसुस कयो हो । वञां या न वञां जी बु॒डि॒तर में हिन तड॒हिं पूरा ब॒ डीं॒हं लगाए छडिया हुआ ऐं पोइ बि को फैसलो न करे सघियो हो । पर बइद में हिन जड॒हिं फैसिलो करे ई वरतो त खेसि पाण खे ई अजब लग॒ण लगो॒ हो त इन में बु॒डि॒तर वारी गा॒ल्हि ई कहिड़ी हुई?
काके खे दिहलीअ मां हिकु ख़तु मिलयो हो । वडे॒ पैमाने ते स्वतंत्रता सेनानियुनि जो सन्मान थियणो हो । काके खे बि उन प्रोगाम में शामिल थियण जी नींड मिलयल हुई । इहा ख़बर सभ खां पहिरीं काके जे वडे॒ पुट घनश्याम अची खेसि बु॒धाई हुई। दिहलीअ मां आयलु ख़तु बि हू ई खणी आयो हो।
सन्मान वारी गा॒ल्हि बु॒धी काको चङीअ देर ताईं त वीचारनि में खोहिजी वियो । आज़ादीअ जी हलचल वारा डीं॒हं खेसि याद अचण लगा॒ ।
उहो बि हिकिड़ो वक़्त हो जड॒हिं कुइट इंडिया जो नारो भारत जी कुंड कुढ़छ में गूंजण लगो॒ हो । कईं नौजवान आज़ादीअ जी हलचल में काहे पिया हुआ । हज़ारें माताउनि-पिताउनि पंहिंजा पुट विञाया हुआ। सजे॒ भारत में घणनि लाड॒लनि पंहिंजूं जानियूं डि॒नयूं हुयूं । सिन्ध बि इन्हीअ में पुठते न पेई हुई । सिन्ध मां बि अनेक जवान आज़ादी आंदोलन में घड़ी पिया हुआ । हिकु जनून हो, हिकु उत्साहु हो, हिक आग हुई... कंहिं बि पंहिंजे देश जी आज़ादीअ खां सवाइ बि॒यो कुझु बि न थे डि॒ठो।
काको बि उन वक़्त जवान हो । हिन में जवानीअ जो जोश हो । हिन अहिड़ा अहिड़ा करतब करे डे॒खारिया हुआ जो अंग्रेज़नि जे नक में दमु अची वेंदो हो । हुन जे अहिड़नि हैरत अंगेज़ कारनामनि करे खेसि घणाई दफ़ा अंग्रेज़नि जूं लठियूं बि खाइणियूं पियूं हुयूं । जेल में वञणु त हिन लाइ मामूली गा॒ल्हि हुई। हींअर उहे सभु गा॒ल्हियूं काको विसारी चुको आहे। तड॒हिं बि उहे कड॒हिं कड॒हिं याद अची ई वेंदियूं आहिन । हिन जे मथां थियल लठियुनि जे वस्कारे वारी गा॒ल्हि त बिल्कुल विसरण जी न आहे । काको विसारण चाहे तडहिं बि हिन जे शरीर जूं चूर चूर थियल हडि॒यूं त इहा गा॒ल्हि पधिरी कयो छडी॒न । केडि॒यूं लठियूं वसायूं हुयूं अंग्रेज़नि हिन मथां! पर मजाल आहे जो हिन जे वात मां का दांहं निकरे । फक़त 'वंदे मातरम' खां सवाइ हिन जे वात मां कुझु न निकतो हो।
दिहलीअ मां आयल ख़त खे काको घणी देर ताईं डिसंदो रहियो हो । घनश्याम खेसि सूचना डे॒ई वियो हो, "बाबा! फैसलो करे बुधाइजो त जीअं टिकेटूं बुक कराए सघां।"
टिकटूं बुक कराइण खां अगु॒, वञण जो फैसलो करण ज़रूरी हो । काके जो मन त इन लाइ बिल्कुल तैयार न हो । तंहिं हूंदे बि दिल जी अंदरींअ कुंड मां कंहिं कंहिं महिल आवाज़ पिए आयो त वञी त डि॒सजे । मस मस त संदसि क़दुर थी रहियो आहे... पर उहो आवाज़ झटि गुम थी पिए वियो । उभरी आयो थे 'ननो' अखर । उन्हीअ इन्कारी लफ़्ज़ बि बा॒हिर अचण में पूरा ब॒ डीं॒हं लगाए वरता हुआ।
काके पंहिंजो फैसलो जड॒हिं घनश्याम खे बु॒धायो त हिन खे इहा गा॒ल्हि न वणी । "बाबा, तव्हां हहिड़ो सुहिणो मौक़ो हथां था विञायो । हेतरनि सालनि में कंहिं बि तव्हां जो क़दुर न कयो आहे । हीअर जड॒हिं तव्हां खे मौक़ो मिली रहियो आहे तड॒हिं इन्कार था करियो।"
काके हमेशह जियां पंहिंजी गा॒ल्हि दुहराईंदे चयो हो “मूं का वडी॒ खेप न खटी आहे। ही त उन वक़्त माहौल ई अहिड़ो हो जो हरको उन्हीअ हलचल में काहे थे पियो । तूं बि उन वक़्त हुजी हा त चुप न रही सघीं हां।"
“ऐं ही तव्हां जेकी धक खाधा आहिन? शरीर में हिकु बि हडो॒ सलामत न बचियो अथव!"
“त छा उन्हनि जे लाइ मां कंहिं खां ऐवज़ो वठां? पंहिंजे देश लाइ लड़ण जो बदिलो वठां? मूंखां इहो कम न थींदो पुट, मूंखां असुल न थींदो।"
घनश्याम खे ख़बर हुई त पीउ खे वधीक चवण अजायो आहे । तंहिं हूंदे बि हिन हिक दफ़ो वरी कोशिश करे डिठी हुई, "बाबा! शहर जे बि॒यन बि स्वतंत्रता सैनानयुनि खे नींड मिली आहे, उहे सभु दिहलीअ वञी रहिया आहिन, बस सिर्फ तव्हां ई..."
काके तमाम मुख़्तसिर में पंहिंजो फैसलो वरी दुहराईंदे चयो हो, “मां न हलंदुस पुट!"
ईंअ तमाम घणे सोच वीचार बइद कयल फैसले ते हिन वरी सोचण खां इन्कार करे छडि॒यो हो । शहर जा सभु स्वतंत्रता सैनानी तमाम घणियूं सौगातूं हासिल करे वापिस मोटी आया हुआ । ब॒ जणा त काके जे घर बि कही आया हुआ ।
हिक जणे काके खे अची चयो, “यार, तूं अवल नम्बर जो ज़िदी आहीं।"
ज़िदी? ज़िदी ऐं मां? हीअ त सिद्धांत जी गा॒ल्हि आहे। ही माण्हू ज़िद ऐं सिद्धांत में फर्क छो न था समझनि? काको सोचण लगो॒ हो पर हिन कुझु कुछियो कोन हो।
बिए जणे चयो हो, "मां त हिकु दफ़ो बि जेल में न वियो हुअस । बस के काग़ज़ डे॒खारियम त कम हली वियो। हींअर त हमेशह लाइ स्वतंत्रता सैनानीअ जो ठपो लगी वियो । हींअर हमेशह तोशो मिलंदो रहंदो।"
काके हिन खे बि को जवाबु न डि॒नो हो । जवाब डि॒बो बि छा? हरको माण्ह पाण जा॒णे ऐं संदसि कर्म जा॒णे।
पोइ बि॒न्ही दिहलीअ जे सफर जूं केतरियूं यादगार गा॒ल्हियूं ब्यान करे काके जे मन खे हिरखाइण जी कोशिश कई हुई। पर काको हो जो ख़ामोशी अख्त़ियार करे वेठो हो।
उन्हीअ खां पोइ कलेक्टर साहिब पाण काके वटि कही आयो हो ऐं काके खे अची चयो हुआई त दिहली मां ख़ास सूचना मिली आहे त मां तव्हां वटि अची तव्हां जो सन्मान करियां । इन लाइ हिकु नंढिडो फंकशन रखण जो बि प्रोग्राम आहे। काके खे वेनती कयाईं त हू पंहिंजी सहूलियत वारी तारीख बु॒धाए ऐं खेसि संदसि सन्मान करण जो वझु डि॒ए पर काके कलेक्टर खे बि हथ जोड़े इन्कार कयो हो ।
काके चयो हो, "देश जी आज़ादीअ लाइ उन लाइ कोन लड़िया हुआसीं त अगिते हली असां जो सन्मान थिए। असांखे उन जो ऐवज़ो न खपे बाबा।"
कलेक्टर कुझु देर काके खे समझाइण खां पोइ वापस हलियो वियो हो । उन खां पोइ शहर जे माण्हुनि गडि॒जी काके जो सन्मान करण चाहियो हो पर उन्हनि खां बि काके हथ जोड़े माफी वरती हुई। काके जो पुट घनश्याम पंहिंजे पीउ जूं अहिड़यूं गा॒ल्हियूं बु॒धी अफसोस खाईंदो रहिजी वेंदो हो । पीउ खे समझाइण जी हू थोरी घणी कोशिश बि कंदो हो पर पीउ जो रुख़ डि॒सी खेसि वधीक कुझु न चवंदो हो।
शहर जे माण्हुनि काके जे साफ इन्कार बइद बि नंढनि नंढनि प्रोग्रामनि में संदसि सन्मान करण शुरु करे छडि॒यो । थींदो छा हो जो काके खे बि॒यन जियां प्रोग्राम जी नींड डि॒नी वेंदी हुई। काको प्रोग्राम में वेंदो हो पर ऐन वक़्तु ते को न को कार्यकर्ता अचानक संदसि नाले जो ऐलानु करे खेसि स्टेज ते घुराए वठंदो हो । उन वक़्त काके लाइ ज॒णु इम्तहान जो वक़्त हूंदो हो । हू उथण न चाहींदो हो पर संदसि ई शहर जा माण्हूं हिन लाइ छा सोचींदा, इहो वीचार करे हू लाचार उथंदो हो ऐं उन खां पोइ आज़ादीअ जे हलचल में काके जे डि॒नल योगदान जी हाज़रीन खे जा॒ण डिं॒दे संदसि नागरिक सन्मान कयो वेंदो हो।
ईंअ ब-टे दफ़ा थियो त काको सावधान थी वियो । हिन पोइ अहिड़नि प्रोग्रामनि में वञण बि बंद करे छडि॒यो पर पोएं दफ़े थियल संदसि सन्मान वक़्त हिन जेको भाषण कयो तंहिं शहर जे माण्हुनि जा कपाट खोले छड़िया। हिन तमाम तिखनि लफ्ज़नि में आज़ादीअ खां पोइ जे देश जी हालत ते दुख जो इज़हार कयो । शहर जे मसइलनि ऐं आम माण्हुनि जे दुखनि दर्दनि ते चिन्ता ज़ाहिर कई। सभ खां वधीक त शहर में वधंदड़ गुंडागर्दीअ लाइ शहर जे चंद गुंडनि खे जवाबदार ठहिराए माण्हुनि खे सुजाग॒ रहण ऐं जरूरत पवे त अहिड़नि अनासरनि खे उघाड़ो करण खां न हिचकण जी बि खेनि सलाह डि॒नी ।
माण्हुनि काके जी गा॒ल्हि ते खूब ताड़ियूं वजा॒यूं ।
काके चयो, “सिर्फ ताड़ियूं वजा॒इण मां कुझु न वरंदो । इन लाइ तव्हां खे घर खां बा॒हिर निकिरणो पवंदो । पहिरीं पंहिंजे शहर खे मज़बूत करियो । माण्हुनि खे कठो करियो । पोइ गूंडनि ऐं संदनि कार्रवायुन खे बेनक़ाब करियो । तड॒हिं ई मां समंझदुसि त तव्हां मुंहिंजो सन्मान कयो।"
माण्हुनि हिक वार वरी ज़ोर सां ताड़ियूं वज़ायूं।
भाषण पूरो करे काको जड॒हिं घर पहुतो त टे जणा अगु॒ में ई संदसि घर जे दरवाजे वटि बीठा हुआ। उन्हनि खे सुजाणण में काके खे देर न लगी॒ । उन्हनि मां हिक जणे चयो, “तव्हां सां गा॒ल्हाइणु था चाहियूं।"
काको हिनन खे अंदर वठी आयो।
“तव्हां खे असां सां कहिड़ी दुश्मनी आहे?" हिक जणे पुछियो।
"तव्हां असांजे ख़िलाफ माण्हुनि खे छो था भड़कायो?” बिए पुछियो ।
"तव्हां खे असां मां कहिड़ी तकलीफ आहे?" टिएं पुछियो।
काके टिन्ही जे सुवालनि जो जवाबु डि॒यण बदिरां उनिखां सुवाल पुछियो, “तव्हां मूं मां छा था चाहियो?"
"खामोशी।" हिक चयो।
"तव्हां चुप रहो।" बि॒ए चयो।
"पंहिंजी ज़बान बंद रखो।" टिएं चयो।
काके वरी बि सुवाल कयो, “ऐं जे इहो सभ कुझु मां न करियां त?"
"त पोइ कुझु बि थी सघंदो आहे।" हिक चयो
“असांजा हथ वडा आहिन ।” बिए चयो।
"असां कुझु बि करे सघंदा आहियूं।" टिएं चयो।
काको कुझु देर ख़ामोश रहियो । पोइ धीरे-धीरे हिन जूं नज़रूं शोख़ थियण लगि॒यूं । हिन आयल टिन्ही शख़्सनि तरफ वारे-वारे सां निहारियो । बइद में हिन चवण शुरु कयो, “डि॒सो... तव्हां जवान आहियो । तव्हां में जवानीअ जो जोश आहे । जोश मुंहिंजो बि थधो कोन थियो आहे । आज़ादीअ जी जंग में सिर तरीअ ते रखी हलणो पवंदो हो । आज़ादी भले मिली आहे पर जंग अञा ख़त्म न थी आहे । जिन्दगीअ जे क़दम क़दम ते जंग लड़णी आहे तंहिं करे तव्हां में थोरी बि समझ हुजे त यकदम हितां हलिया वञो ऐं वञी के सुठा कम करे डे॒खारियो।"
टिन्ही जणनि हिक बि॒ए डां॒हुं निहारियो पर संदनि पेर उते ई बीठल रहिया । पोइ हिक जणे गा॒ल्हाइण जी कोशिश कई, “काका..." पर काके हिन खे रोकीदे चयो, "बस...मुंखे बी का गा॒ल्हि बु॒धणी कान्हे । तव्हां हितां हलिया वञो..."
तड॒हिं हिक जणे जोश में अची चयो, “काके जे सजे॒ शरीर में हिकु हडो बि कोन बचियो आहे तड॒हिं बि आकड़ छडे॒ कोन थो।" पोइ हिन बाक़ी बि॒न साथियुनि खे चयो, “हलो दोस्तो... हीअर हिन काके खे सिधो करण जो को बिलो करणो पवंदो।"
हू दर तरफ वापस वरण लगा॒ । काके बि गुस्से में अची खेनि चई डि॒नो, “सिधो त मां तव्हां खे कंदुसि । भजो हितां।"
काको चवण ख़ातिर चई त वियो पर हिनन टिन्ही शख़्सनि जे वञण खां पोइ हू हिकदम ढिलो थी वियो। हिन जे कनन में हिनन जा चयल लफ्ज़ "हीअर हिन काके खे सिधो करण जो को बिलो करणो ई पवंदो।" गूंजंदा रहिया । काके जे सजे॒ शरीर मां ज॒णु सतु ई मोकलाए वियो। हिन खे पहिरियों भेरो ईअं लगी॒ रहियो हो त हू स्वतंत्रता सैनानी न, हिक आम इन्सान आहे, आम इन्सान जी जिन्दगी जी रहियो आहे जंहिं में हिन जो को बि मुल्हु न आहे । हिन खे लगो॒ त पोएं प्रोग्राम में खेसि वञण न खपंदो हो । जीअं हेलताईं पंहिंजे नाले ऐं सन्मान कराइण खां पाण खे बचाईंदो पिए आयो तीअं उन्हीअ प्रोग्राम में बि हू पाण खे बचाए हा । न हिन जो सन्मान थिए हा ऐंन हिन खे गा॒ल्हाइणो पवे हा । न गा॒ल्हाइणो पवे हा, न हिन खे धमकी मिले हा । सभ कुझु त आराम सां गुज़री रहियो हो । जे माहौल ख़राब आहे त उन खे सुधारण जो अकेले हिन ई त ठेको कोन खंयो आहे।
अचानक काके पंहिंजनि इन्हनि वीचारनि खे इते अटकायो । हिन खे हरुभरु ईंअ ढिलो न थियण खपे । जंहिं पंहिंजी हयातीअ जा केतरा साल, जवानीअ जा अहम साल पंहिंजी जान जी रती मात्र बि चिंता न कई हुई तंहिं खे ईअं हिमथ हारे न विहण घुरिजे । आख़िर चिंता छा जी? जान जी न? जान त हिन अगु॒ में ई वतन मथां क़ुर्बान थियण लाइ अर्पे छड़ी हुई। हीअ त हिन जी क़िस्मत हुई जो संदसि जान बची वेई हुई न त... ऐं ही टरिड़ा जवान त जनूनी अंग्रेज़ सिपाहियुनि अगि॒यां कुझु बि न आहिन । त पोइ ही ख़ौफ छा जो? पर बि॒ए खिन हिन सोचियो, हिन खे पंहिंजी जान जी त परवाह न आहे पर घनश्याम, उन जी वनी ऐं हिनन जा बा॒र? कड॒हिं बि कुझु बि थी सघंदो आहे। हिन शहर में हूंअ बि अहिड़यूं गा॒ल्हियूं नयूं न आहिन । किथे आहे सलामती? किथे आहे शान्ती? किथे आहे इन्सान जी क़ीमत?
न न... हरुभरु ईंअ न आहे । हिन खे ईंअ कमजोर न थियण खपे । हिनन टरड़नि बदमाशनि जो पोल पधरो करणो ई पवंदो। अख़बारुं आहिन, सभाऊं आहिन, पोलीस आहे... हिनन बदमाशनि खे इन्हनि अगियां उघाड़ो करण बिल्कुल ज़रुरी आहे।
काके खे हिमथ अची वेई । हू उथियो । हिन यकदम फैसलो करे वरतो तो अजु॒ खां वठी हू नई जंग में बहिरो वठंदो।
- हूंदराज बलवाणी
टिप्पणियाँ
एक टिप्पणी भेजें